ايه اكتر حاجة ممكن تبسطك..؟؟؟

السؤال على الرغم من بساتطه الا انى اتفجئت اول ما واحد صاحبى سألهولى , ماعرفش ليه بصراحة بس بجد انا حسيت انى مش عارف ارد عليه او عمال احاول اجيبله كلام من الى بسمعه فى الافلام من نظام انى اتجوز او انى الاقى شغل , علشان كدة انا قلت اعملها زى حمله وواعرف ايه اكتر الحاجات الى ممكن تفرح الناس وقررت ابتدى بنفسى واسيبكو تكتبو اكتر حاجات بتفرحكو فى التعليقات ,على الاقل لو ماطلعناش بفايدة من الموضوع يبقى ضحكنا شويه , انا عن نفسى اكتر حاجات بتفرحنى:
ا1- انى اسمع صوت الشيخ رفعت قبل الفطار فى رمضان
ا2- انى اسافر اسكندريه ( اسكندريه بالزات يا رجاله)
ا3- انى اعمل خدمه لواحد ماعرفوش والاقى نظرة امتنان على وشه( لاخوانا اللغات امتنان ديه حاجة حلوة مش شتيمه)
ا4- انى اكون مروح مهدود من الكليه والاقى الحاجه عامله اكله محترمه فى البيت
ا5- انى احس ان الناس الى حاوليا بتحبنى
ا6- كل ما رئيس الوزارة فى مصر يمشى بحس بفرحة كبيرة قوى ماعرفش ليه الصراحه
ا7- لما بمشى لوحدى باليل قوى فى وسط البلد والاقى البلد فاضيه وريحتها حلوة
ا8- لما عبد الحليم على يضيع جون
ا9- لما الاسماعيلى يطلع من اى بطوله هو مشارك فيها
ا10- لما الاهلى يكسب اى مطش انشالله مع نادى مصانع المكرونه
ا11- لما بقابل اصحاب ماشوفتهومش من زمااااان
ا12- انى احس ان انا مهم ( مش غرور لكن انى احس ان ليه لزمه فى الدنيا مش عايش اونطه)
ا13- لما اقعد لوحدى الساعه اربعه الصبح قدام الكمبيوتر
ا14- لما اقعد لفترة طويله عمال افكر فى حل مسئله واوصل لحلها مرة واحده ( ساعتها الواحد بيحس انه ولا الخوارزمى فى زمانه وهو اساسا ولا يوصل للعمامه بتاعته)
ا15- لما اعرف اصالح اتنين متخانقين مع بعض
ا16- لما اعرف ان اتنين اصحابى هايتجوزو ( بجد شعور جامد فحت , انا نفسى ماكنتش متخيل انى ممكن افرح كدة)
ا17- لما الاقى حد يقدر يفهم انا عايز اوصل لايه من اول مابتدى كلام
ا18- لما اسمع ان فى امريكان جداد ماتو فى العراق( مش كره فى الى مات نفسه )
ا19- لما اجيب النتيجة فى اخر السنه واعرف ان احنا( انا واصحابى) رفعنا راس اهلاينا
ا20- لما اعرف ان اسرائيل اتزحزحت من على الخريطه لحد ماوقعت فى البحر
ا21- لما اسمع ان حزب الله عمل عمليه عسكريه جديدة
ا22- لما بشترى كتاب جديد( اكيد ساعتها جمب الفرحة بكون بتحسر على الفلوس الى ادفعت)
ا23- لما اقعد اقرى الكتاب الى فات ويعجبنى
ا24- لما ايران تعمل القنبله النوويه
ا25- لما اشوف اللون الاخضر ممتزج مع البرتقانى وفى نفس الوقت فى طراطيش صفرا فى النص
كفايه كدة النهادرة ومستنى اشوف احسن حاجات ممكن تفرحكو انتو كمان فى التعليقات
ملحوظة1 اى حد هايقرا الكلام ده لازم يسيب هو برده اكتر حاجات ممكن تفرحه فى الكومينت تحت
ملحوظه2 معلش احنا خرجنا عن النطاق النقدى بتاع البلوج وخليناه شخصى شويه , بس ده مايمنعش ان البلوج لسه محتفظ بمنهجه الثابت والى فوق ده بس فى سبيل كسر الملل .
ودومتم

M.bazeed

مبروك يا جيمى

معلش النهاردة وعلى غير العادة هانتكلم فى السياسه ., ايه مالك بتتلفت حواليك كدة ليه وعمال تحسس على قفاك , لا يا سيدى ماتخفش المكان متأمن كويس
- اقرب مخبر على بعد اتنين متر- وعاملين حسابنا على كل حاجة من الالف للياء
- اول بس ماتيجى الكبسه اجرى – خلاص يا عم استريحت ..؟؟ اهدى بقى وركز معايا ..... اكيد انت سمعت بخبر حفل زفاف ابن مصر البار – بار ديه تقريبا جايه من البتاع الى بيعودو عليه علشان يشربو عليه حاجة اصفرا – وحامى حما بلاد غربستان – مصر سابقا – ولى عهد المملكه السيد جمال مبارك على الانسه المبجله خديجة خدوجة فى حفل زفاف اسطورى – على الضيق يعنى – طبعا من حقه انه يتجوز زى ماهو عايز بس بصراحة الموضوع ده فكرنا بموضوع قديم شويه عن شويه كلام اتنطورو عن سيرة التوريث ,سامع واحد بيقولى يا عم سيب الراجل يتمتع بشبابه فى اليومين دول ... ماشى ياسيدى يتمتع زى ماهو عايز بس بعيد عن قفانا .. بصراحة انا بقالى تلات سنين نفسى اعرف حاجة واحدة :مين جمال مبارك ده ... قصدى مادام هو زى مابيقول مش هايترشح للرئاسه خالص و مش هايكبس على انافسنا بعد الحاج والده- لا اطال الله فى عمره المديد – يبقى ليه واخد مكانته الجامدة قوى ديه فى البلد , يعنى لاهو رئيس وزارة ولا حتى وزير علشان يبقى فى الهيلامان ده كله يبقى اكيد الموضوع فى ان – وكان واصبح واخواتهم كلهم – ........... انا عن نفسى ماعنديش ادنى اعتراض على شخصيه عمنا جمال تمنعه من انه يكون رئيس , بس الموضوع مش حكايه شخصيه حكايه ان اى بلد بتحترم نفسها – بعد الشر على بلدنا – ماينفعش رئيس الدوله يدى الرئاسه لابنه هديه – مش العزبه بتاعه ابوهم - وبرده حرام بعد مافضلنا مستحملين 25 سنه يجيلنا حد من نفس السلاله العجيبه ديه ويعدلنا 25 سنه كمان ,.. طب ماتيجى نلعب لعبه , ماتيجى تفكر معايا كدة ايه الى هيحصل فى مصر بعد ما عمنا جمال يمسك الحكم .... تفتكر ايه هاتبقى العناوين فى الجرايد فى الايام ديه: .....
ممكن مثلا تلاقى الاخبار طالعه بمانشت يقول : عاد السيد الرئيس سالما الى ارض الوطن من زيارته السريعه الى ارض منغوليا وذلك لتوطيد العلاقات المصريه المنغوليه – ماهو اكيد مصر ساعتها مش هاتكون تعرف اى دول غير مانغوليا – وممكن برده نلاقى الاهرام طالعه بمانشت تانى : السيد احمد عز وزير التجارة يصبح من اغنى تلاته فى العالم - الى اداك يدينا يا سيدى – ولو بصينا بقى على جرايد بلاد بره ممكن نلاقى مانشت بيتكلم عن مصر بيقول : مؤشرات تظهر خطط لتوليه حسين مبارك الرئاسه المصريه بعد ابيه – المحروس ابن جمال وحفيد الحاج الكبير - ...... سامع واحد تانى بيقولى وانت بقى ساعتها ان شاء الله هاتكون فين ., عايز تعرف ... روح على كوبرى سته اكتوبر دقق نظرك هاتشوف واحد نافش شعره .. ولابس فلنه مقطعه وماسك علم البرتغال وبيقول بصوت عالى : مش عزبه ابوكو هيه ... مش عزبه ابوكو هيه.
ودومتم

M.bazeed

Vote for me

بعد يوم طويل وممل فى الكليه , وبعد مشوار غتيت من حلوان حتى بيتنا الميمون جت الساعة اخيرا الى الواحد بيعد فاضى فيها . وكعادة الشعب المصرى اول حاجة فكرت فيها كانت التلفزيون . ومن مسلسل غتيت لاغنيه خليعه(جامدة كلمه خليعه ديه) لبرنامج سخيف , وقفت فى الاخر عند قناه ميلودى (اكيد تعرفها ) بس المرة ديه ماكنتش بتعرض اغانى من الى بالى بالك ولا حتى البرامج العجيبه الى بتجيبها ديه , كانت بتعرض حاجة جديدة خالص ..لاقيت واحد كدة طالعلى من الشاشه ونافشلى صدره (ولا اكنه هولاكو ملك البسطرمه )وبيسبل للكاميرا ولا اكنه الحفيد التلاتاشر لكازانوفا وبيقولى :- انا عبد الصمد عبد السميع طالب فى كليه ......... هوايتى الرقص والمزيكا ... كود11 ....فوت فور مى.....!! وراح خارج من الكادر وطلع واحد تانى مكانه (بنفس الصدر المنفوخ بتاع ملك الكبدة فى فيلم البط الشرس ..!) وقال نفس الكلمتين واعقبهم بنفس الكلمه المستفزة ..فوت فور مى..., بصراحة انا فضلت متنح قيمه ربع ساعه عقبال مافهمت الموقف اتارى الاساتذة عاملين مسابقة لاختيار ملك جمال مصر....!!! اوعى تستغرب ايوة والله ملك جمال مصر وكمان ايه .. فى ناس مهتمه جدا بالموضوع وناس بتبعت رسايل وهدايا وجوايز للى بيفوز . لما الواحد حس انه كان بيبات بره مصر السنتين الى فاتو , ولا حتى التليفزيون بتاع بيتنا بقى بيستقبل قناه ميلودى بتاعه السويد مش بتاعه مصر.
دمك اتحرق؟؟؟؟ حسيت بالشلل الى كنت حاسه وانا عمال اتفرج على شويه شباب كل واحد فيهم قد الباب وكل همه فى حياته انه يبقى الدلوعة الجديدة بتاعة مصر ... والمشكله الاكبر ان دول بس الى وجدو الفرصة وانتهزوها .... وان فى غيرهم ملايين من شباب بلدنا المحروسه على اتم استعداد انه يدفع نص عمره وياخد فرصه زى ديه .... بصراحة من كتر التفكير جاتلى حاله احباط جامدة وبالزات ان الموضوع ده عرفت بعده على طول خبر وفاه 15تلميذة كانو رايحين مدارسهم ومالقوش حاجة يروحو فيها غير عربيه نص نقل ( ناس ليها التسبيل والكاميرا وناس تانيه مش لاقيا العيش الحاف ) ... مرة واحدة حسيت ان بلدنا عماله تضيق عليا اكتر واكتر لحد مابقاش فيها الا عبد الصمد وامثاله ... حاولت حتى انى ادور على الشباب الى كنا بنشوفه زمان فى التليفزيونات ايام الاعتصمات والمظاهرات والمطالبه بالحقوق , بس للاسف مالقيتش غير واحد ولا اتنين بس , وحتى الى اتبقو بقو موضه قديمه ماحدش بيسمعهم او حتى بيهتم بيهم ... بقينا خلاص فى زمن عبد الصمد واخوات عبد الصمد ....ولغايه بقى ما الوضع ده يتغير او نلاقى بلد جديد غير بلدنا لسه فيها رجاله ماقدرش اقول غير حاجة واحدة :- كلنا وراك يا عبد الصمد .....كلنا هانصوتلك ..... واحتمال هانصوت على نفسنا..........

M.bazeed

ايه الى حصل..؟؟

جربت مرة قبل كدة انك تمشى لوحدك فى شارع فى مصر قريب ...اى شارع مش شرط يكون فى وسط البلد اوحتى فى حارة صغيرة
لوجربت تاخد المغامرة ديه(على فكرة بقت مغامرة دلوقتى) جرب تبص فى وشوش الناس حواليك ,لو جربت زيى صدقنى هاتشوف العجب العجاب!!!... اول مرة اشوف فى حياتى الناس مقروفة بالشكل ده. كل واحد ياما باصص فى الارض ياما بيبص بنظرة حسرة وغضب للناس الى حواليه .. جرب تخرج من الشارع وتعمل مغامرة اكبر (ده لو قدرت تعدى من المغامرة الى فاتت) وتركب اوتوبيس . ماتخفش جرب وانت مش خسران ... ايوة اطلع من الباب الى فى اخر الاتوبيس.. حاول تطلع بسرعة والاتوبيس بيتحرك انت عارف حركة جموع الشعب بتبقى ازاى وهى طالعة الاتوبيس ( تلطيش واقلام وشلاليت وصويت ستات مالحقتش تطلع بعد ماطلعت ولادها) لو عرفت تطلع سليم بص الناس بتتعامل مع بعض ازاى .. كل واحد مش طايق الى جمبه ..كل واحد مستنى للتانى غلطة علشان يمسك فى خناقه و حتى لو ماعملوش حاجة هاتلاقيه بيتلكك على اى حاجة ... مرة ركبت اتوبيس بالشكل ده وواحد داس على رجل الى جمبه ..موقف عادى جدا ممكن يحصل فى اى مكان وينتهى بكلمه انا اسف ..لكن الاتنين ماسكتوش ونزلو تهزيق وضرب فى بعض ولا اكنه قتل مرات ابوه مش داس على رجله...!!!!!! حاجة بالشكل ده على مااعتقد تخلينا نقف مع نفسنا كتير قوى ونطرح سؤال مهم جدا............................
ايه الى حصل للناس...؟؟؟؟؟؟؟؟
عمرى ماشوفت فى حياتى كلها الناس بالصورة ديه.. اول مرة اشوف الناس عندها الكم الرهيب ده من الاحباط او من عدم المبالاه ولا اكن المصريين مابقاش هاممهم حاجة سواء فرح او حزن او مكسب او خسارة او حتى انهم يعيشو....!!!
طب هو ايه الى جد فى حياتهم علشان يتحولو للصور ديه ؟؟؟؟ فقر ..؟؟ طول عمر الناس فقيرة ومش بتتكلم...؟؟ قهر...؟؟؟بقالنا خمسين سنه بالشكل ده ومافيش حد وصل للمرحله ديه ... امال ايه الى حصل ؟؟ الدكتور جلال امين لاحظ الى وصله الشعب المصرى وعلل الموقف لاختلاف مستويات الفقر فى مصر ووجود متطلبات زيادة فى كل وقت .. بس اكيد فى سبب تانى مش معقوله الناس كلها مرة واحدة هايتغيرو فى يوم وليله ... طب الناس الى مش فقيرة ليه اتغيرت..؟؟؟ ليه مابقتش مستحمله برده ؟؟؟؟ انا عن نفسى احترت بس على ما اعتقد الموضوع اكبر من فقر او قهر الموضوع بقى وسط عام .. وسط مابقاش المصرى حاسس فيه بوجوده .. بقى حاسس انه مهما عمل هايفضل برده مكانه ولا اكنه عمل حاجة.. بمعنى اصح بيحرث فى ميه ...او انه بقى مهمش جدا.. كل الحاجات الى بتمسه مابقاش هو الى بياخد قرارها وكل حاجة بقى مجبر عليها من اول الاكل الى بياكله لحد صوته الى هايديه فى الانتخابات...... وابسط مثال على كدة الاضرابات العماليه الى بقت تحصل فى مصر والمظاهرات الى اول مرة نشوف فيها رب اسرة ماسك مشتريات السوبر ماركت فى ايده وفى ايده التانيهيافطة معارضة ..
من وجهة نظرى الموضوع بقى مؤشر خطير جدا.... بقى عامل زى الانبوبه الى عمالين نسخن فيها واحنا مش حاسيين انها ممكن تنفجر فى اى لحظة...!! ولغايه بقى الانبوبه ماتنفجر ... او الناس تتغير تانى..ماتحولش تدوس على رجل الى جمبك فى الاتوبيس..
ودومتم......

M.bazeed